Түз тағысын атқан Абай облысы, Үржар ауданының үш тұрғынына жаза тағайындалды, деп хабарлайды Buqara.kz сайтының тілшісі.

«Жануарлар дүниесін қорғау, өсімін молайту және пайдалану туралы» ҚР Заңының 38-бабы, 5-ші тармағының 6-тармақшасын өрескел бұзған қылмыстық топ аңшылық алқаптардың резервтік қорында аң аулады. Ондай әрекетке тыйым салынғанын біле тұра алдын-ала келісіп, қылмысқа қасақана барған.

- Аудан тұрғындары өткен жылдың қазан айында Үржар ауылының солтүстігіне қарай 60 шақырым жерде орналасқан «Сарытерек» жер учаскесіне «ВАЗ-2121 Нива» маркалы автокөлігімен барған. Қанжығаларын қабан шошқамен майламақ болған үшеу өздерімен бірге алып шыққан 12-калибрлі, тегіс қос ұңғылы «ИЖ-43», «ТОЗ -34Р», «ТОЗ-34» модельді аңшылық мылтықтары мен оқтарын дайындаған, - делінген Абай облысы бойынша ҚАЖД Үржар аудандық №1 пробация қызметінің аға инспекторы Эльмира Мукитанова ұсынған мәліметте.

Ресми ақпаратқа сүйенсек, аталған топ жабайы шошқаны іздеп тауып, тыйымға қарамастан қаруларының шүріппесін басып жіберген.

- Үш адамның іс-әрекетінен табиғатқа, мемлекетке 1 293 750 теңге көлемінде материалдық залал келтірілді. Ұсталғандарға Үржар аудандық сотының үкімі негізінде ҚР ҚК-нің 337-бабы, 3-ші бөлігімен 1 жылға бас бостандығынан шектеу жазасы тағайындалды, - делінген ақпаратта.

Жаза мұнымен шектелмеді. Заңсыз қабан атқандар 3 жыл мерзімге аң аулау құқығынан айырылып, жыл сайын мәжбүрлі еңбекке тартылды. Қазіргі таңда бұл адамдар Үржар аудандық №1 пробация қызметінің бақылауында.