Алтай ауданының полиция бөлімі патрульдік полиция батальонының қызметкерлері Алтай-Зубовск тасжолын патрульдеу кезінде жол бойында Зубовск ауылына қарай сиырды жетектеп бара жатқан екі ер адамды байқаған, деп хабарлайды Buqara.kz сайтының тілшісі.

Мән-жайды анықтау барысында жетектегі мал оларға тиесілі емес екені белгілі болған. Қаскүнемдер жануарды өрістен айдап кетуге тырысыпты. Мал иесі 60 жастағы Алтай қаласының тұрғыны екені анықталды.

– Полиция бөліміне жеткізілген күдіктілер өз кінәларын толық мойындады. Қылмысқа барған қос тұрғынның жеке тұлғалары анықталды, олар жастары отыздың төртеуіне келген жұмыссыз жүргендер болып шықты, – деді полиция бөліміндегілер.

Араға аз уақыт салып Алтай ауданы ПБ бастығының атына мал иесінің алғыс білдірген бейнежазбасы келіп түсті. Онда ол кісі полиция қызметкерлерінің кәсібилігін ерекше атап өткен.

Қазір ұрлық жасауға оқталған әрекетке сәйкес ҚР ҚК-нің 24-бабы 1-бөлігінде, 188-1 бабының 2-бөлігінің 1-тармағына сәйкес сотқа дейінгі тергеп-тексеру амалдары жүргізілуде.