Аталған университеті баспасөз қызметінің мәліметінше, студенттік үйлердегі шойын радиаторлар алюминийге ауыстырылып, жылыту жүйесі мен душ кабиналары жөнделді. Барлық жатақхана пандустармен қамтамасыз етілген, деп хабарлайды Buqara.kz сайтының тілшісі.
Мемлекет басшысы Қасым-Жомарт Тоқаев студенттік жатақханаларда орын тапшылығы мәселесін шешу бойынша бірқатар міндеттерді алға қойды. Қазіргі таңда еліміздің жоғары оқу орындары жаңа оқу жылы қарсаңында жатақханалар дайындығын белсенді бастап кетті. С.Аманжолов атындағы ШҚУ ректорының айтуынша, университетте Студенттер үйінің мәселесін шешу – басым бағыттың бірі.
ЖОО ректоры Мұхтар Төлеген жаңа оқу жылында білім алушылар әлеуметтік-тұрмыстық жағдайлары жақсартылған жатақханаларда тұратын болатынын атап өтті. Ыңғайлы бөлмелер, жаңа төсек-орын, жаңартылған жиһаз және жылыту жабдықтары жақсартылып, әр бөлмеде Wi-Fi орнатылған.
– ШҚУ жатақханалары мен оқу корпустары жаңа оқу жылына 100% дайын. Біз жыл сайын студенттерді орналастыру алдында мұқият мониторинг жүргізіп, олардың жайлы өмір сүру жағдайларын бағалаймыз. Бүгінгі таңда студенттік үйлердегі шойын радиаторлар алюминийге ауыстырылды, жылыту жүйесі мен душ кабиналары жөнделді. Барлық жатақханалар пандустармен қамтамасыз етілген. №4 және №5 Студенттік үйлерде 45 жылдан бері ауыстырылмаған жаңа терезелер мен қоршаулар орнатылды. Бұл орындалған жұмыстың аз ғана бөлігі, – дейді ректор.
Университет инфрақұрылымы бойынша ауқымды жұмыс мұнымен аяқталған жоқ. Жаңа оқу жылында студенттерге практикалық оқытуға арналған озық жабдықтармен жабдықталған физика, биология және химия кабинеттері өз есігін ашады. Startup-жобаларды және инновациялық кәсіпкерлік жүйені дамытуға бағытталған «Shygys-BASTAU» технопаркі, сондай-ақ өңірде цифрландыруды дамыту үшін IT-мамандарды біріктіретін IT-Hub жұмыс істейтін болады.
– Жаңа кеңістікке медиа зал, «Idea Room», «Lounge zone» және диалог аймағы кіреді.
Сонымен қатар жаңа нысандар тізімінде Тұрақты даму орталығы және «EdSmart Premium» интерактивті бейнежазба мультимедиялық студиясы бар. Студент жастар үшін Smart кітапханасы бар Coworking те ұйымдастырылды, – делінген ЖОО баспасөз қызметі ұсынған мәліметте.
