Бұқтырма су қоймасы жағалауында болған өрттің шығу себебіне қатысты болжам айтылды, деп хабарлайды Buqara.kz сайтының тілшісі.

ШҚО ТЖД баспасөз қызметінің мәліметіне сүйенсек, тілсіз жау 18 мамыр күні сағат 21.21-де Жаңа Бұқтырма ауылындағы «Яры» демалыс базасында шыққан. Оқиға орнына жедел жеткен өрт сөндірушілер 350 шарты метр аумақтағы 4 үй мен моншаны шарпыған қызыл жалынды ауыздықтауға кірісті. Бұдан бөлек, өрт жалпы аумағы 250 шаршы метр шөп пен тал-бұтаға жайылған. Өрт сол күні 22.27-де толықтай сөндірілді. Зардап шеккен ешкім жоқ.

– Тілсіз жауды ауыздықтауға жалпы саны 30 адамды құрайтын №20 өрт сөндіру бөлімінің өрт сөндірушілері, жедел құтқару жасағының құтқарушылары, орманшылар және полицейлер жұмылдырылды. Алдын ала болжам бойынша, өрттің шығу себебі – отты абайсыз пайдаланудан немесе электр жабдықтарын орнату және пайдалану кезінде өрт қауіпсіздігі ережелерін бұзудан болуы мүмкін, - деп хабарлады ведомство өкілдері.