Осы күнге дейін егер әкесінің аты Асан-Әлі болып, дефиспен жазылса, бала құжатында Асанұлы немесе Әлиұлы деп берілетін неме Асанәліұлы болып бірге жазылатын. Енді заңды түрде құжатта дефиспен жазуға рұқсат берілді, деп хабарлайды Buqara.kz тілшісі Baq.kz сайтына сілтеме жасап.

Бұл жөнінде Мәжіліс депутаты Майра Айсина хабарлады.

"ҚР кейбір заңнамалық актілеріне мемлекеттік қызметтер көрсету мәселелері бойынша өзгерістер мен толықтырулар енгізу туралы" Заңға дәл осындай өзгерістер енгізілген екен.

Қосарланған есім беру мәселесі қазақстандықтар арасында түсініспеушілік туғызып отыр. Баланың құжатындағы әкесінің қосарланған есімі бойынша түзету енгізілді. Бұған дейін әкенің аты тек бірге жазылатын немесе қосарланған есімнің біреуі ғана берілетін. Яғни, әкесінің аты Асан-Әлі болып, дефиспен жазылса, бала құжатында Асанұлы немесе Әлиұлы не болмаса дефиссіз Асанәліұлы болып бірге жазылатын. Заң жобасында бұл мәселе қаралып, дефиспен, яғни сызықшамен жазуға рұқсат берілді, - деп мәлімдеді Майра Айсина бүгін өткен баспасөз мәслихатында.

Бұған дейін, мемлекет азаматтың өтінім беруін күтпей-ақ, қызметтерді өзі ұсынатыны туралы хабарланған. Мысалы, өмірге нәресте келгенде оның туғанын есепке алу, бала туу бойынша берілетін жәрдемақының екі түрін тағайындау, тұрғылықты мекенжайына тіркеу және балабақша кезегіне қою бір мезетте ұсынылады.

Сонымен қатар, азаматтың жеке персоналдық деректеріне қол сұғып, оны заңсыз алған адамдар үшін әкімшілік және қылмыстық жаза қолданатыны хабарланған.