Шығыс Қазақстан облысының әкімі «Amanat» партиясының партиялық бақылау мүшелері Серік Оразбай және Ғани Шаймардановпен кездесті, деп хабарлайды Buqara.kz сайтының тілшісі. 

Кездесу барысында ұзақ мерзімді құрылыс мәселелері талқыланды. Олардың қатарында Катонқарағай мен Марқакөл аудандарында дене шынықтыру-сауықтыру кешендері бар. Қазіргі таңда құрылыс, сәулет және қала құрылысы басқармасы Сыбайлас жемқорлыққа қарсы қызметпен бірлесе отырып, нысандарды аяқтап, пайдалануға беру бойынша жұмыс жоспарын құрды.
Сонымен қатар кездесуге қатысушылар өңірдегі туризм мен инфрақұрылымды дамыту мәселелерін талқылады. Ғани Шаймарданов Катонқарағай өңірінің тумасы, туризм саласында жұмыс істейді. Ол аймақ басшысына Катонқарағайға баратын жол бойындағы дәретханалардың жоқтығы мәселесін айтты.
– Ауданға баратын жолда бірде-бір заманауи дәретхана жоқ. Шетелдік қонақтарды шақыру ұят, енді мен де оларды салғым келеді, - деді ол. 
Облыс әкімі аймақтың туристік маршруттары бойында санитарлық-гигиеналық нысандар салу жобасын қолдап, «Ертіс» ӘКК-не қажетті есептеулерді дайындауды тапсырды. Алтай, Үлкен Нарын және Катонқарағай аудандарының әкімдері жер телімдерін беріп, сумен қамтамасыз етеді.