Атап айтсақ, ақпан айында Ұлттық құрама спортшылары спорттың 18 түрі бойынша 17 лицензиялық жарыста өнер көрсетеді, деп хабарлайды Buqara.kz сайтының тілшісі Kazinform сайтына сілтеме жасап. 

Дзюдо, семсерлесу, спорттық гимнастика, ауыр атлетика және батуттағы гимнастика бойынша сынға түсетін спортшылар Париж Олимпиадасының жолдамасын рейтингтік ұпай беретін жарыстарға қатысады. Сонымен бірге, су спорты түрлері, бокс, жеңіл атлетика өкілдері төртжылдықтың басты жарысына іріктеу турнирлерінде бақ сынайды.
Қазіргі таңда Қазақстан ұлттық құрамасының қоржынында Париж Олимпиадасының 19 лицензиясы (спорттың 8 түрінен) бар (садақ ату – 4, велошоссе – 3, нысана көздеу – 5, қазіргі бессайыс – 2, бокс – 2, грек-рим күресі – 1, еркін күрес – 1, спорттық гимнастика – 1). Олимпия ойындарына дейін 69 лицензиялық жарыс қалды. Оның ішінде 5 әлем чемпионаты, 7 Азия чемпионаты және 57 рейтингтік турнир бар.
- Осы жылдың басты спорттық оқиғасы деп 26 шілде мен 11 тамыз аралығында Парижде өтетін жазғы Олимпия ойындарын айтуға болады. Әр төрт жылда бір рет өткізілетін Олимпиадаға әлемнің 205 елінен 10 мыңнан астам спортшы қатысады деп жоспарланған.Париждегі додада 32 спорт түрінен 329 медаль жиынтығы сарапқа салынады. Қазақстан ұлттық құрамасы Олимпиадаға спорттың 20 түрінен қатысуды жоспарлап отыр. Сондықтан қазіргі таңда басты мақсат – қысқа мерзімде мейілінше көп лицензия алу.Құрама көшбасшылары әр спорт түрінің ерекшелігі, спортшының қажеттілігі, медициналық-биологиялық тұрғыда қамтамасыз етілгені, оның ішінде физиотерапия, оңалту мен жарақаттардың алдын алу, психологиялық қолдау және жарысқа дайындық кезінде күйзелісті жеңу сияқты жағдайлар ескерілген жеке жоспар бойынша дайындалады, - деді туризм және спорт министрі Ермек Маржықпаев.
Айта кетейік, бүгін Франция астанасы Парижде дзюдодан әлемдік Grand Slam турнирінің жалауы желбіреді. Астана қаласында күрес түрлерінен ел біріншілігі өтіп жатыр.