Әлемдік ресми күрес парақшасы өз салмағында үздік ондықты түйіндеп тұрған еркін күрес шеберлерінің тізімін ұсынды, деп хабарлайды Buqara.kz сайтының тілшісі.
Мұның алдында жерлесіміз Данияр Қайсановтың 57 ұпаймен үшінші орынға жайғасқанын жазған едік. Семейлік Азамат Дәулетбековтің (86 келі) халықаралық сайыстарда оза шапқанымен өткен жылы Нұр-Сұлтанда өткен Әлем чемпионатына қатыса алмауы, биыл Нью-Делиде өткен Азия чемпионатында жүлдеге іліне алмауы тиісті ұпайлар жинауға мүмкіндік бермеген екен. Нәтижесінде жерлесіміз он спортшының тізіміне ілінбеді. 
Сонымен 57 келіде екі дүркін Әлем чемпионатының жүлдегері Нұрислам Санаев 5-ші (39 ұпай), 65 келіде бірнеше дүркін Әлем чемпионатының жүлдегері Дәулет Ниязбеков 3-ші (56 ұпай), 70 келіде  Азия чемпионы, Әлем чемпионатының күміс жүлдегері Нұрғожа Қайпанов 3-ші (40 ұпай), 79 келіге дейінгі салмақта Ғалымжан Өсербаев 3-ші (32 ұпай), 97 келіде Әлішер Ерғали 5-ші (32 ұпай) және 125 келіге дейінгі салмақта Азия чемпионы атанған Юсуп Батырмурзаев 6-шы (32 ұпай) орынға тұрақтаған.