Оқиға қаладағы орталық базарда орын алған, деп хабарлайды Бұқара.кз сайтының тілшісі.

- Будақтап шыққан түтінді көрдік. Бірден өрт сөндірушілерді көмекке шақырдық. Олар келгенше бір қойма заттар өртеніп кетті, - дейді куәгерлер.

Саудасын жүргізіп жатқан базар сатушыларының назарын өрт сөндірушілер мен полиция қызметкерлерінің көлігі аударды. Алғашында тек түтіннің иісін ғана сезген базар келушілері артынан қою қара түтінге мән береді. Арнайы мамандар жеткенше оқиға орнына бір топ адамдар жиналып қалған.

Өрт сөндірушілер кескіш құралдар арқылы контейнерлердің есігін кесіп, жартысынан көбі жанып кеткен тауарларды шығарды.
Одан бөлек, өрт ошағының жанындағы контейнерлер де қатты ысып кеткен. Түтін есігі жабық тұрған қоймалардың ішінен шықты. Лаулаған жалын көрінбейді.

Мамандар өрт себебін анықтауда. Әзірге келген шығын көлемі мен қойма иелері анықталуда.