25 қараша күні бірнеше қалалық авто тасымалдаушылармен келісімшартты бұзу туралы сот шешімі қабылданды, деп хабарлайды Buqara.kz тілшісі.

Сот шешіміне сәйкес қалалық тұрғын үй-коммуналдық шаруашылық, жолаушылар көлігі және автомобиль жолдары бөлімі «АТЦ «БЭСТ» және «Vosca» ЖШС-мен келісімшартты бұзды. Тасымалдаушылар шағымдануға құқығы бар.

-Біз шағымданамыз ба, жоқ па, әлі шешкен жоқпыз, - дейді «ATЦ «БЭСТ» ЖШС директоры Елена Рядинских. - Қалай болғанда да, шешім күшіне енгенше автобустар маршрут бойынша жолаушыларды тасымалдай береді.

«АТЦ «БЭСТ» ЖШС №43, 43а, 25, 25а және 417 қалалық маршуттарға, «Vosca» ЖШС - №33, 42, 12, 5, 71а, 67, 39 және 351 маршуттарға қызмет көрсетеді.

Бұған дейін қоғамдық көліктердегі жеңілдіктердің жойылғандығы туралы хабарлаған болатынбыз.

«АТЦ «БЭСТ» ЖШС үстіміздегі жылдың 1 шілдесінен, «Vosca» ЖШС 2019 жылдың 8 шілдесінен бастап 70 жастан асқан зейнеткерлер мен 7-15 жас аралығындағы балалар үшін жеңілдіктер беруден бас тартты. Кейін оқушыларға жеңілдіктерін қайтарып берді.