86 жастағы зейнеткер отқа оранған үйде қалып қойған, деп хабарлайды Buqara.kz сайтының тілшісі.

Өскемен қаласының ТЖБ мәлімдегендей, 24 қазан күні сағат 22.00-де Депутаттар көшесіндегі үйлердің бірінде өрт шыққан. Алдын ала болжам бойынша құрылыс нысаны жанып, артынан көрші тұрған үйді шарпыған.

– Аталған көшеге таяу маңда өтіп бара жатқан 17-18 жас шамасындағы Алишер мен Денис Пичугин қалың түтінді көріп үйге жүгіріп кірген. Жалын шарпыған бөлмеден өжет екі бозбала кейуананы сыртқа алып шыққан, – деп мәлімдеді баспасөз қызметіндегілер.

№5 Өрт сөндіру бөлімінің қызметкерлері жалпы аумағы 190 шаршы метр өртті дер кезінде ауыздықтады. Оқиға себебі анықталуда.