Бүгін «Жас ТАЛАП-KZ» көшбасшы» оқушылар байқауының жеңімпаздары белгілі болды. Д. Серікбаев атындағы Шығыс Қазақстан техникалық университеті жыл сайын олимпиада өткізіп келеді, деп хабарлайды Buqara.kz сайтының тілшісі.

Білім додасында оза шапқандар ШҚТУ ректорының атаулы грантына ие болады. Байқау бірнеше кезеңнен тұрды: іріктеу кезеңінде оқушылар ШҚТУ-дың www.ektu.kz ресми сайтындағы «Талапкер 2022» бөлімінде пәндер бойынша Online тестілеуден өтті, бүгін университет базасында өткен екінші турға қатысты. Қатысушылар – ШҚО  орта мектептерінің 9,10,11 сынып оқушылары.

Байқау жеңімпаздары төрт пән бойынша анықталды: «Математика», «Физика», «География», «Бейнелеу өнері және сызу».
«География» пәні бойынша III орындарды №45 орта бейіндік мектептің 9 сынып оқушысы Ерасыл Төлеубек пен Оралхан Бөкей атындағы №44 лицейдің 11 сынып оқушысы Кәмила Қадылбекова жеңіп алды.  «Математика» пәні бойынша III орынды Оралхан Бөкей атындағы №44 лицейдің 11 сынып оқушысы Расул Нұрый иеленді. «Физика» пәні бойынша Риддер қаласының №1 мектеп-лицейінің 10 сынып оқушылары Абылай Сләмжанов пен Маргарита Ударцева жоғары нәтиже көрсетті. Айтпақшы, Маргарита ректордың атаулы грантын жеңіп алды. «Бейнелеу өнері және сызу» бойынша III орын Оралхан Бөкей атындағы №44 лицейдің 11 сынып оқушысы Дильназ Ахмади, II орын Белоусовка №1 орта мектебінің 11 сынып оқушысы Диляра Әшимовға берілді.  Ал бірінші орын және ректор гранты Заки Ахметов атындағы №16 орта мектебінің 11 сынып оқушысы Маржан Мейірбековаға бұйырды.

Екінші және үшінші орындарға ие болған қатысушылар Д. Серікбаев атындағы ШҚТУ мен IT-колледжде оқудың бірінші жылында 25-тен 50% - ға дейін жеңілдіктер алды.