5 шілде күні сағат 18:30-да ШҚО филармониясының көрермендер залында 1999 жылдан бері әлемнің 140-тан астам қаласында қойылған "Mamma mia!" мюзиклінің премьерасы өтеді, деп хабарлайды Buqara.kz сайтының тілшісі.

Осы уақыт ішінде мюзиклді 27 миллионнан астам адам тамашалады. Енді қала тұрғындары мен қонақтары әлемдегі ең танымал музыкалық спектакльдердің бірін тамашалай алады.

Мюзиклдің негізін Швецияның "ABBA" тобының 22 хит әні құрайды. Оның ішінде: "Dancing Queen", "Money Money Money", "Take a Chance on Me", "The Winner Takes It All" және "Mamma Mia" бар. Спектакльдегі диалог ағылшын тілінен қазақ тіліне аударылған, ал орындалатын хит әндері ағылшын тілінде түпнұсқада шырқалады.

Музыкалық спектакльге ШҚО драма театрының актерлері, сондай-ақ ШҚО филармониясының солисттері, әртістері және бишілері қатысады. Жақын арада жоғарыда аталған барлық ұжымдар "Шығыс Қазақстан облыстық драма және оперетта театры" шаңырағында бірлесіп жұмыс атқарады. Сонымен қатар "Жарғанат" опереттасына, "Айсұлу" операсына қатысқан солист Арника Байбусынова және Әсел Темірованың жетекшілігімен Халық әртістері ағайынды Абдуллиндер атындағы Шығыс Қазақстан өнер училищесінің аралас хоры өздерін үшінші мәрте сынап көрмек. Дәстүрлі аспаптық бөлімді бас дирижер, ҚР Еңбек сіңірген қайраткері Александр Галсановтың жетекшілігімен ШҚО әкімінің симфониялық оркестрі орындайды.