10 желтоқсанда таңертеңгі сағат 09:00-ден бастап ШҚО электр сиреналарын іске қосқаны жөнінде телерадио арналары арқылы ескерту жүйесіне жоспарлы тексеру жүргізіледі, деп хабарлайды Buqara.kz тілшісі.

Төтенше жағдайлар туындаған кезде тұрғындардың назарын аудару үшін электр сиреналары немесе басқа сигнализация құралдары қосылады, бұл «БАРЛЫҒЫНЫҢ НАЗАРЫНА!» бірыңғай ескерту дабылын береді.

Егер сіз жұмыста, қоғамдық жерде, көшеде болсаңыз және сиренаның, яғни «БАРЛЫҒЫНЫҢ НАЗАРЫНА» дыбыстық белгісін естісеңіз, 104.0 жиілігіндегі «Қазақ радиосын» бірден қосу керек. Үйде сигналды естіген жағдайда теледидарды дереу «Хабар», «31 канал», «КТК», «Қазақстан» арналарына қосып, ақпаратты мұқият тыңдап алыңыз.

- Барлық ересектер өздері және балаларға сиренаның дыбысы «БАРЛЫҒЫНЫҢ НАЗАРЫНА» белгісі екенін үйреткені жөн, - деп түсіндірді департаменттің баспасөз қызметі. - Мұны естігенде, қорықпаңыз, керісінше оның себебін түсініп алыңыз. Сирена жаттығуларына түсіністікпен қарауларыңызды сұраймыз!