«Ертіс концерт» КМҚК кіші залында ақын Ұлықбек Есдәулеттің 70 жылдық мерейтойына арналған «Төр Алтай жырлайды» поэзия-фестивалі ұйымдастырылды, деп хабарлайды Buqara.kz сайтының тілшісі.
Ұлықбек Оразбайұлы – белгілі ақын, журналист, Қазақстанның еңбек сіңірген қайраткері, Қазақстанның мемлекеттік сыйлығының иегері, ҚР Жазушылар одағының мүшесі. Зайсанның тумасы саналы ғұмырын қазақ әдебиеті мен мәдениетінің дамуына арнаған.
Аталған шараға ШҚО Мәдениет басқармасы және ҚР Жазушылар одағының облыстық филиалы мұрындық болды. Мақсаты – мерейтой иесінің шығармашылығын насихаттап, келер ұрпаққа үлгі ету, жас ақындарға қолдау көрсету.
Жыр кешінде облыс әкімі Ермек Көшербаев ақынды мерейлі жасымен құттықтап, Президент Қасым-Жомарт Тоқаевтің ашықхатын табыс етті. Алыс-жақыннан келген қонақтар да жылы лебіздерін білдірді. Олардың қатарында белгілі ақын Маралтай Райымбеков, жазушы, ҚР Мемлекеттік сыйлығының лауреаты Әлібек Асқар, ақын, ҚР мемлекеттік сыйлығының лауреаты Гүлнар Салықбай, ақын, ҚР «Дарын» мемлекеттік жастар сыйлығының лауреаты Қалқаман Сарин бар. Мәдениет комитетінің репертуарлық саясат және өңірлік қызметті үйлестіру басқармасының басшысы Рига Онаева ақынға Мәдениет және ақпарат министрі Аида Балаеваның құттықтау хатын ұсынды.

- Бүгінгі фестиваль Ұлықбек Есдәулеттің құрметіне ұйымдастырылып отыр. Біз бұл шараға жыл сайын 15 жас ақынды қатыстырып, облыс әкімінің бір реттік стипендиясын ұсынатынбыз. Биыл 20 ақын өнерлерін ортаға салмақшы. Шығыстың ақындары өте мықты, азулы. Олар Алатау мен Арқаға да бой бермеген. Сондықтан оларға үнемі қолдау көрсетуіміз керек. «Төр Алтай жырлайды» Өскеменде соңғы қазақ қалғанша жалғасын табатын болады, - деді қаламгер, Қазақстан Жазушылар одағы ШҚО филиалының директоры Әлібек Қаңтарбаев.
Фестиваль барысында өңірдің жас ақын-жазушылары жыр шумақтарын тарту етіп, арнайы марапатқа ие болды.
Ақын Ұлықбек Есдәулет ендігі кезекте өзі өскен Зайсанға табан тіреп, жерлестерімен жүздесу кешіне қатысады.
Қымбат МУХАМАДИЕВА