Өскемендегі жеке кәсіпкер ақша ұтып алғанын айтқан алаяқтарға 200 мың теңге аударып жіберген, деп хабарлайды Buqara.kz сайтының тілшісі.    
ШҚО Полиция департаменті баспасөз қызметінің мәліметіне сүйенсек, кәсіпкердің «Вайбер» мессенджеріндегі аккаунтына 4700 доллар ұтып алғаны туралы хабарлама келген. Алайда ол ақшаны алу үшін 200 мың теңге аудару керек екендігі жазылыпты. Бұдан бөлек, қаладағы емхананың дәрігері де кибералаяқтардың құрбанына айналған. Белгісіз біреулер оның ұялы телефонына қоңырау шалып, «қылмыскерлер сіздің банктік шотыңыздағы ақшаны шешіп алмақ болған» деп алдайды. Бұған сенген әйел алаяқтарға барлық мәліметтерді айта салады. Осылайша жәбірленуші 400 мың теңгеге шығынға батқан.
– Аталған екі факті бойынша жедел іздестіру шаралары жүргізілуде. Көп жағдайда мұндай қылмыстар шетелден жасалады. Сондықтан істі ашу ұзаққа созылуы мүмкін, - делінген ведомство мәліметінде.