Үздік шахматшыларды іріктеу мақсатында еліміздің түкпір-түкпірін аралап жүрген «Шахмат керуені» бүгін Өскемен қаласына келді, деп хабарлайды Бұқара.кз сайтының тілшісі.
Елімізде шахмат спортын дамыту мақсатында іске қосылған республикалық жобаның бас серіктесі – Freedom Broker. Керуен Қазақстандағы барлық облыс орталықтарын аралап шықпақ. Өскеменге келмес бұрын Көкшетау, Петропавл, Қостанай, Қарағанды, Павлодар мен Семей қалаларына тоқтаған.
«Алғашқы үш мың шақырымды жүріп өтіп, Өскеменге келдік. Бұл – «Шахмат керуенінің» ең шығыс нүктесі. Шахмат турнирі тек әуесқой ойыншылардың сайысы емес. Оған қарапайым халықтан бөлек, кәсіпкерлер мен жергілікті билік өкілдері де назар аударып, ұлттың зияткерлік әлеуетін дамытуға көмектесуі керек. Сол үшін де алда тағы 14 мың шақырым жол жүреміз. Біз қазірдің өзінде аймақтардағы шахматшылардың қалай тырысып жатқанын көріп отырмыз. Турнирге қызығушылық танытқан олар алға қарай ұмтылып, дами түскісі келеді. Сондықтан бұл қозғалысты барлығымыз қолдасақ, бірге үлкен нәтижелерге қол жеткіземіз», – деді Қазақстан шахмат федерациясының вице-президенті Александр Бабенко.
Керуеннің келуі аясында Шығыс Қазақстан облысында Қазақстан шахмат федерациясының филиалы ашылды. Оның төрағасы болып кәсіпкер Анвар Рахимов сайланды.
Республика алаңында орнатылған мобильді киіз үйде гроссмейстермен бір реттік ойын мен шахмат турнирі болды. Халықаралық дәрежедегі спорт шебері, ШҚО-дағы шахматтың бас тренері Алмагүл Манапқызының айтуынша, 19 қыркүйек күні Өскемендегі кітапханада іріктеу турнирі өткен. Оған қатысқан 85 адамның 20-сы бүгінгі жартылай финалда бақ сынасты.
Турнир қорытындысы бойынша 14 жастағы Айза Төлекова қарсыластарынан оқ бойы озық шығып, жеңімпаз атанды. Оның шахматпен айналысқанына үш жыл болған.
Екінші орынды Әділжан Сәдібековке алса, үшінші орынға Владимир Иконин жайғасты. Үшеуі де қараша айында Түркістанда өтетін бас финалға барады. Бұл жеңімпаздардан бөлек, турнирдің тағы үш қатысушы «50 жасқа дейінгі шахматшы», «Ең жас шахматшы» және «Әйелдер арасындағы үздік нәтиже» аталымдары бойынша марапатталды.
