Семей қаласының кәмелетке толмағандардың істері жөніндегі учаскелік аға инспекторы жеткіншек төрт баланы өрттен құтқарды, деп хабарлайды Buqara.kz сайтының тілшісі.

Оқиға қазан айының 28-і күні «Қарағайлы» тұрғын ауданындағы пәтерлердің бірінде болған. Розетка кенеттен түтіндеп, ыс тұрғын үйді жайлап кетті. Онда көпбалалы отбасы тұрып жатқан. Өрт кезінде балалардың жанында ересектер болмаған екен.

- Сағат 16.30 шамасында қызмет барысымен жүрген Семей қаласы полиция басқармасының Әуезов полиция бөлімі кәмелетке толмағандардың істері жөніндегі аға учаскелік инспекторы полиция майоры Динара Қабышева үйдің кіреберісінде өрт иісін сезіп, 3 қабатқа көтерілгенде балалардың жылап, көмекке шақырған дауыстарын естіген. Полиция қызметкері дереу өртке қарсы қызметке қоңырау шалып, жедел жәрдем бригадасын да шақырған, - делінген мәліметте.

Келіп жеткен өртке қарсы қызмет қызметкерлері есікті бұзып, пәтерден 6 жас, 4 жас, 2 жас және 5 айлық балаларды алып шыққан. Қуанышқа орай, бүлдіршіндердің зардап шеккені анықталмады.

- Электр сымдарынан ақау шығып, түтіндей бастаған. Балаларды сыртынан жауып кетіпті. Мен бірден өрт сөндірушілер мен жедел жәрдем шақырдым, - деді Динара Ғибадоллақызы.

Көпбалалы ана полицейлерге балаларын құтқарғаны үшін алғысын жаудыртты.