Шығыс Қазақстан облысы Риддер қаласында жүк көлігі жыраға құлап, 2 адам көз жұмды, деп хабарлайды Buqara.kz сайтының тілшісі Kazinform агенттігіне сілтеме жасап.
ШҚО Полиция департаменті баспасөз қызметінің мәліметіне сүйенсек, жол-көлік оқиғасы Риддер қаласының маңындағы тасжолда болған.
«Жүк көлігінің жүргізушісі рульге ие бола алмай қалды. Соның салдарынан көлік жыраға құлап, аударылып түскен. Жол апатынан екі жолаушы сол жерде тіл тартпай кетті», - делінген ақпаратта.
Қазіргі уақытта аталған факті бойынша ҚР Қылмыстық кодексінің 345-бабы 4-бөлігіне (Көлік құралдарын басқаратын адамдардың абайсызда екі немесе одан да көп адам өліміне әкеп соққан жол қозғалысы ережелерін бұзуы) сәйкес сотқа дейінгі тергеу амалдары басталды.
Бірқатар сот-медициналық сараптама тағайындалған. Соның қорытындысы бойынша процессуалдық шешім қабылданады.
