Бүгін Шығыс Қазақстан облысының әкімі Даниал Ахметовтің өкімімен Шәкәрім Бұқтығұтов облыс әкімінің орынбасары қызметіне тағайындалды. Бұған дейін ол «ШҚО өңірлік мемлекеттік-жеке меншік әріптестік орталығы» АҚ Басқарма төрағасы қызметін атқарды, деп хабарлайды Buqara.kz сайтының тілшісі.
Даниал Ахметов жаңа орынбасарын жиналыс барысында таныстырды. Оның тәжірибелі басқарушы екенін және ауыл шаруашылығы саласына жетекшілік ететінін атап өтті. Шәкәрім Бұқтығұтов 1961 жылы 8 наурызда Көкшетау қаласында дүниеге келген. 1985 жылы Өскемен құрылыс-жол институтын «инженер-механик», сондай-ақ Шығыс Қазақстан мемлекеттік университетін «экономист» мамандығы бойынша тәмамдаған. Еңбек жолын слесарь, кейін «Өскемен жабдықтау» басқармасының бас механигі болып бастаған. Жабдықтау, сату және көтерме сауда жүйесінде басшылық лауазымдарда жұмыс істеді.
