Салық органдарында тіркеусіз тұрғын үйді жалға берудің 501 фактісі анықталды, деп хабарлайды Buqara.kz сайтының тілшісі.

Қызмет көрсетілетін әкімшілік учаскелерде құқық бұзушылықтардың алдын алу шараларын күшейту мақсатында қыркүйек айының 1-нен бастап облыс аумағында «Учаске» жедел-алдын алу іс-шарасы жүргізілуде.
Жалға берілетін пәтерлер, саяжай массивтері, құрылыс объектілері, оның ішінде тоқтатылған және қараусыз қалған, жертөле үй-жайлары, базарлар және басқа да сауда орындары, қолайсыз отбасылар, жастар мен кәмелетке толмағандар шоғырланған орындар, азаматтық қару иелері мен шетелдіктер тексерілуде.
- Осылайша, жедел алдын алу іс-шарасы басталғаннан бері қызметкерлер көп қабатты үйлердің 267 000-нан астам пәтер, 206 000-ға жуық жеке үйлер мен 51 594 саяжай үйін аралап шықты. 4 400-ден астам жалдамалы пәтерлер, 5 691 шаруа қожалығы, қыстақтар мен учаскелер тексерілді, базарлар мен өзге де сауда орындарында 1 784 рейд жүргізілді. Белгілі тұрғылықты жері жоқ 521 адам ұсталды, - делінген мәліметте.
Анықталғандай, салық органдарында тіркеусіз тұрғын үйді жалға берудің 501 фактісі анықталды. Барлық осындай фактілер бойынша тиісті ақпарат иелеріне шара қолдану үшін Мемлекеттік кірістер департаментіне жолданды.
Сонымен қатар әкімшілік учаскені аралау барысында Семей қаласында бір тәулік ішінде кәсіпкерлік қызметке қандай да бір рұқсат құжаттарынсыз ұзақ мерзімге жалға берген 5 пәтер анықталды. Материалдар ШҚО Семей қаласы бойынша Мемлекеттік кірістер басқармасына жолданды.
- ІІО-да есепте тұрған 37 000-нан астам адам тұрғылықты жері бойынша тексерілді. Әкімшілік жауапкершілікке тартылғандар саны 32 312 адам. Заңсыз айналымнан тіркелмеген атыс қаруының 31 бірлігі алынды. Жедел алдын алу шарасы желтоқсан айының 1-не дейін жалғасады, - деді жауапты тұлғалар.