ІІМ мүлікті қорғау бойынша бағдарламасын іске асыру мақсатында Өскемен және Семей қаласының криминалдық полиция бөлімшелері ұрланған телефондарды тексеру жұмыстарын жүргізді, деп хабарлайды Buqara.kz сайтының тілшісі.

Ресми мәліметке сүйенсек, осы жылдың 1 қыркүйегінен бастап жүргізілген «Учаске» жедел алдын алу іс-шарасы аясында ұрланған телефондарды сату орындарын тексеру және оның жолын кесуге бағытталған іс-шаралар іске асырылған.

Осы кезеңде жедел уәкілдер пайдаланылған телефондарды сататын 42 орынды тексерді. Жұмыс барысында 800-ге жуық телефон тексерілді, оның 11-нің қылмыстық іс бойынша өтіп жатқаны мәлім болды. Олар тәркіленіп, сотқа дейінгі тергеп-тексеру материалдарына қоса тіркелді.

Сонымен қатар рейд барысында полиция қызметкерлері бутик иелерімен және ұялы телефон сатушылармен ҚР Қылмыстық кодексінің 196-бабында қарастырылған қылмыстық жолмен табылған мүлікті сатып алғаны немесе өткізгені үшін қылмыстық жауапкершілік туралы түсінік жұмыстарын өткізді.