Мамандар тұрғындардың аюларды неліктен жиі кездестіретінін айтты, деп хабарлайды Бұқара.кз сайтының тілшісі.

ШҚО орман шаруашылығы және жануарлар дүниесі аумақтық инспекциясы қызметкерлерінің сөзінше, биылғы жылы Шығыс Қазақстанда аюлардың өсімі байқалады.

– Біріншіден бұл жануарлардың табиғи ортада тым көп болып кетуіне байланысты. Осы жылы аю саны 2654-ті құраған. Қолайсыз ауа райы мен азық жетіспегендіктен олар төрт түлікке шабуылдап, омарта мен қоқыс жәшіктерін аралауда, – дейді мамандар.

Өткен жылы аңшылық шаруашылықтарымен қоңыр аюды атып алуға 57 рұқсат қағаз берілген. Жуықта ғана басталған биылғы аң аулау маусымы 30 қарашаға дейін жалғасады.

Бұған дейін, «Громотуха» демалыс базасында демалушылар аюды бірнеше рет кездестірген. Еске сала кетсек, әлеуметтік желіде бірнеше күн бұрын қонжықтарымен жүрген аюдың видеосы таралған еді.