Шығыс Қазақстан облысында Beginit by inDrive әлеуметтік көшбасшылық және жобалық жұмыс курсына іріктеу кезеңі басталды, деп хабарлайды Buqara.kz сайтының тілшісі.

Бұл бағдарлама өңір бойынша 10-сынып оқушыларын, әсіресе ауылдың балаларын әлеуметтік көшбасшылыққа баулып, арнайы курстардан сабақ алуға мүмкіндік береді.
Жобаға қатысқан жастар көшбасшылық қасиетті меңгеріп қана қоймай, облыстың сан-алуан мәселесін талқылап, жергілікті қаумдастықтарға оң әсерін көрсете алады.
Beginit by inDrive төрт кезеңнен тұрады: аймақтық іріктеу кезеңі, білім беру модулі, жастар лагері және жобалық модуль. Бірінші кезеңде еліміздің алты облысынан 600 оқушы іріктеледі. Оның ішінде Батыс Қазақстан, Жамбыл, Қарағанды, Қостанай, Павлодар және Шығыс Қазақстан облыстарының жастары қатысады. Екінші турға өтетін 300 бала жоба туралы, әлеуметтік көшбасшылық туралы ақпарат алып, кейстерді қарастыратын болады.
Сондай-ақ психология-диагностикалық сауалнама мен аналитикалық тапсырмалар беріледі. Сол бойынша оқу екпінділері қоғамда болып жатқан мәселелер немесе өңірлік проблемалар сынды әр-түрлі тақырып аясында ізденістерін шындайды. 60 оқушы Алматы таулары бөктеріндегі оқу лагеріне барып, Қазақстанның басқа аймақтарындағы құрдастарымен танысып, тәжірибе алмасады.

- Біз жастардың көшбасшылық қабілеттерін артыру үшін жағдай жасаймыз. Мысалы, әлемге танымал Билл Гейтс, ұлы ақынымыз Абай Құнанбайұлы, «Невада-Семей» қозғалысын бастағандардың бірі Олжас Сүлейменов те халықтың көшбасшысы болып, тарихқа үлкен өзгеріс әкелген. Жоба барысында тәжірбиелі бизнес және креативті сала жетекшілері қатысушыларға аймақтағы өзекті мәселелерді шешу үшін ғылыми және әлеуметтік жобалар құруды үйретіп, бағыт-бағдар береді. Сондай-ақ Beginit бағдарламасының финалистері  Алматыда 2025 жылы ашылатын жаңа инновациялық университетте оқуға грант алады, -  дейді Beginit by inDrive жобасының бас маманы Ерсайын Қабдрашев.
Өзінің бағын сынап келген Амина есімді оқушы қыз IT саласы жастарға көп мүмкіндік беретіндігін айтты. «Ең бастысы ата-ананың және мұғалімдердің қолдауы» дейді ол.
Ал жоғарыда аталған Beginit by inDrive платформасы Astana Hub және Oskemen IT Hub қолдауымен жүргізіліп жатқан бастамалардың бірі. Бұдан бөлек, InDrive қалааралық қатынас және жүктасымалы, курьерлік жеткізу және жұмыс іздеуді қамтитын қызметтер тізімін дамытып келеді. InDrive әлемнің 40-тан астам елінде бар.

Валентина СЕЙІТҚАНОВА