Өскемендегі «Жекпе-жек» сарайында ҚР Спорт шебері Ерболат Қабдықаловты еске алуға арналған еркін күрестен ашық республикалық турнир аяқталды, деп хабарлайды Бұқара.кз сайтының тілшісі.

ШҚО денешынықтыру және спорт басқармасының баспасөз қызметі ұсынған мәліметке сүйенсек, боз кілем бәсекесіне облыстың әр жерінен бөлек, Алматы, Семей қалаларынан жас балуандар келді. Ұйымдастырушылардың айтуынша, жалпы жүлде қоры 250 мың теңгені құраған.

Бұған дейін бес мәрте облыс деңгейінде өткізілген жарыс, биыл республикалық деңгейге көтерілгенін айта кетейік. Турнирдың ашылу салтанатында облысқа белгілі спорт ардагерлері балуандарға сәттілік тіледі.

– Жарыстың басты мақсаты – жастар арасында салауатты өмір салтын ұстануға шақыру, облыстың спорт дәрежесін көтеру. Сондай-ақ, алда тұрған ірі додаларда облыс намысын қорғайтын жастарды құрамаға іріктеу, – Бас төреші Нұрболат Мағзұмов. Екі күнге созылған бәскелер тартысқа толы болды. Әсіресе, ақтық бәсекелер көрермендердің есінде қалғаны сөзсіз.

Спорт академияда жаттығатын өскемендік Ілияс Ерболатов барлық қарсыластарын айқын ұтып өз салмағында үздік атанды. Сондай-ақ, өскемендік Айзат Қожанжаров қарсыластарын қоғадай жапырып, турнир жеңімпазы атанды. Жеңімпаздар мен жүлдегерлерге марапаттау қағазы, медаль және ақшалай сыйлық табыс етілді.