Әлеуметтік желілерде Өскемендегі бөлімшелердің бірінде коронавируспен ауыратын науқастардың қандай жағдайда емделіп жатқаны туралы көрсетілген видео пайда болды. Аурухананың бас дәрігері бұл ақпаратқа қатысты түсініктеме берді, деп хабарлайды Buqara.kz сайтының тілшісі.

Күні кеше пациенттер бұрынғы № 2 перзентхананың ғимаратында емделді. Алайда «Ана мен бала» орталығының директоры Ермек Омарбековтың айтуынша, кеше бұл бөлімде коронавируспен ауыратын науқастардың саны 89 адамнан асқан. Сондықтан Денсаулық сақтау басқармасымен бірлесіп, аталған орталықтың базасында науқастарға арналған қосымша 300 төсек орналастыру және пациенттерді жаңа бөлімшеге ауыстыру туралы шешім қабылданды.

– Бүгінгі таңда барлық науқастар осында орналастырылған. Бұл ғимаратта ӨЖЖ аппаратына қосылған, реанимация жағдайындағы үш науқас қалдырылды. Өмірлеріне қауіп төндірмеу үшін оларды тасымалдамауды жөн деп санадық. №2 перзентхана бөлімшесінде қазір екі медициналық бригада жұмыс істейді. Осы пациенттердің денсаулығы тұрақталған соң олар «Ана мен бала» орталығына ауыстырылады.

Ермек Сембайұлы ғимараттың науқастарды қабылдауға дайын емес екендігі туралы ақпаратты жоққа шығарды. Оның сөзінше, бөлімшедегі барлық палаталар жабдықталып, күніне төрт рет тамақтану ұйымдастырылған.

- Видеода жас жігіт сынған дәретхананы әртүрлі бұрыштан түсіріп, бөлімшедегі барлық дәретханалардың жай-күйі туралы жаңсақ пікір тудырған. Біз науқастарға бір дәретхана жұмыс істемейтінін ескерткенбіз. Сондай-ақ видеода бос кереуеттер мен төсек жабдықтары қойылған палата көрсетілген. Бұл резервтік палата, онда пациенттердің ешқайсысы емделмейді.

Орталық директоры бөлімше Өскемендегі эпидемиологиялық ахуалдың кез-келген жағдайына дайын екенін атап өтті.

– Бізде жеткілікті мөлшерде барлық дәрілік заттар бар. Бөлімшеде 60-тан астам медицина қызметкері жұмыс істейді. Бейнежазбада ер адам кеше науқастарға инъекциялар жарты сағатқа кешіктірілгенін айтты. Мен кешірім сұраймын, бұл жағдай басқа ғимаратқа көшуге байланысты орын алды. Барлық емдеу процедуралары орындалды. Ана мен бала орталығының базасында 33 желдеткіш бар, қазір оның 11-і коронавируспен күресуге жұмылдырылған. Сондықтан кез келген уақытта резервтің қалған бөлігін пайдалана аламыз. Бүгінгі күні ӨЖЖА-ға мұқтаж пациенттер жоқ. Бұдан басқа, бізде 23 оттегі концентраторы бар, екінші толқын жағдайында дайынбыз, – деп түйіндеді Ермек Омарбеков.