Балалар жазушысы Марат Қабанбайдың 75 жылдық мерейтойына орай оқушылар арасында облыстық әдеби шығармашылық байқау жарияланды, деп хабарлайды Buqara.kz сайтының тілшісі.
Өскемендегі Оралхан Бөкей атындағы қалалық кітапхана ұйымдастырып отырған байқаудың мақсаты – Марат Қабанбайдың шығармашылық мұрасын насихаттау, жас ұрпақтың кітап оқуға деген құштарлығын ояту. Байқауға 7-17 жас аралығындағы мектеп оқушылары қатыса алады.
– Жазушы жерлесіміз Марат Қабанбайдың өмірі және әдеби мұрасы бойынша қазақ және орыс тілінде орындалған шығармашылық жұмыстар қабылданады, атап айтқанда бейнероликтер, анимация, комикс, сөзжұмбақ, интерактивті онлайн-ойындар, буктрейлер, иллюстрация. Байқауға ұсынған жұмысты #MaratKabanbay75baikau, #bokeykitaphanasy хештегімен әлеуметтік желілерге салу және кітапхана поштасына ukcbs@mail.ru жолдау қажет. Сондай-ақ кітапхананың Instagram - @bokeykitaphanasy, TikTok желісіндегі - ukcbs парақшаларына жазылу керек, – делінген кітапхана қызметкерлері таратқан ақпаратта.
Қатысушы өзінің аты-жөнін, тұрғылықты мекенжайын, мектебін, сыныбын, электронды мекенжайы мен телефон нөмірін қалдыруы тиіс. Орындаған жұмысына тақырып қойып, жазушының қай шығармасы бойынша орындағанын көрсетуі қажет. Байқауға жұмыстарды қабылдау 2023 жылдың 1 наурызында аяқталады. Жеңімпаздарды марапаттау 15 наурызда Марат Қабанбайдың 75 жылдық мерейтойы қарсаңында өтеді.
