ҚР ІІМ полиция генерал-лейтенанты Ержан Саденовтің бұйрығымен ШҚО ПД бастығының орынбасарлары лауазымына  полиция полковнигі Қазбек Тақжанов пен полиция подполковнигі Эльдар Қарсақбаев тағайындалды, деп хабарлайды Buqara.kz сайтының тілшісі. 

Жаңа орынбасарларын жеке құрамға облыстық Полиция департаменті бастығы, полиция генерал-майоры Ерлан Омарбеков таныстырды. 

Қазбек Тақжанов – Риддер қаласының тумасы. Қазақстан-Американдық еркін университетін бітірген. Құқық қорғау органдарында 1998 жылдан бері қызмет етіп келеді. Қызметтік мансабын Солжағалау полиция бөлімінің анықтаушысы ретінде бастаған. Тергеу бөлімшелеріндегі жұмыс өтілі 24 жылға жуық уақытты құрайды. Осыған дейін Қазбек Мұхтарұлы Абай облысы бойынша Анықтау басқармасының бастығы қызметін атқарған. Енді ол тергеу және криминалистикалық бөлімшелерге жетекшілік ететін болады. 

Эльдар Қарсақбаев Ұлан ауданында дүниеге келген. Шығыс гуманитарлық институтын аяқтап, еңбек жолын жедел қамтамасыз ету орталығының инспекторы болып бастаған. Құқық қорғау органдарында 2006 жылдан бері жұмыс істейді. Подполковник Эльдар Ерғалиұлы ШҚО ПД Ақпараттандыру және байланыспен қамтамасыз ету саласына жетекшілік ететін болады. 
Әріптестерін жеке құрамға таныстырған өңірдің бас полицейі олардың алдарына басқаратын бағыттары бойынша бірқатар міндет қойды.