Бүгін облыс көлемінде тұрғындардан қару сатып алу бойынша кезекті акция басталды, деп хабарлайды Buqara.kz сайтының тілшісі.

ШҚО Полиция департаменті 25 сәуірден бастап өңір аумағында «Тұрғындардан заңсыз сақталған атыс қаруын, оқ-дәрілер мен жарылғыш заттарды сатып алу бойынша» акциясы өткізілетінін хабарлайды.

– Бұл ретте заңсыз сақталған қаруды, оның оқ-дәрілерін, жарылғыш заттарды өз еркімен тапсырған адамдар қылмыстық және әкімшілік жауапкершіліктен босатылады. Сондай-ақ қару-жарақ заттарын өз еркімен тапсырғаны үшін қарудың техникалық жай-күйіне байланысты оның әрбір бірлігі үшін төлем көзделеді, – делінген мәліметте.

ШҚО ПД бастығының бірінші орынбасары Елдос Закимов атап өткендей, 2021 жылы азаматтардан 116 өтініш келіп түсті, 159 атыс қаруы тапсырылды. Атыс қаруын, оқ-дәрілерді және жарылғыш заттарды қабылдау ПД-ның әрбір аумақтық бөлімінде жүргізіледі.

Тәртіп сақшылары жарақат алудың алдын алу мақсатында табылған жарылғыш материалдармен және оқ-дәрілермен ешқандай іс-әрекет жасамауды, оларды тасымалдауға әрекет етпеуді, тек полицияның кез-келген бөлімшесіне, «102» арнасына хабарлауды сұрайды.