Шығыс Қазақстан облысы Глубокое ауданында үйден шығып кетіп, жарты айдан астам уақыт бойы хабар-ошарсыз жоғалған зейнеткердің денесі табылды, деп хабарлайды Buqara.kz сайтының тілшісі Kazinform агенттігіне сілтеме жасап.

Глубокое ауданы Белоусовка кентінде тұратын Купсюк Вера Григорьевна 10 қараша күні үйден белгісіз бағытта шығып кетіп, сол күйі оралмаған.

Алайда оның жоғалғаны туралы хабар полиция қызметкерлеріне тек 26 қарашада түсті.

Тәртіп сақшылары жедел-іздестіру шараларына шұғыл кіріскен болатын. Сондай-ақ іздестіруге еріктілер де жұмылдырылған.

ШҚО полиция департаментінің мәліметіне сүйенсек, бүгін 74 жастағы кейуананың денесі табылды.

Алайда оның нақты неден көз жұмғаны тек сараптамадан кейін ғана белгілі болмақ. Мәйіттің қайдан табылғаны туралы да ақпарат берілмеді.

Естеріңізге салсақ, осыған дейін ШҚО-да үйден белгісіз бағытта шығып кеткен зейнеткердің жарты айдан бері табылмай жатқанын хабарлаған едік.