Облыс тұрғыны әпкесінің WhatsApp желісіне балағат сөздері бар аудиожазба жіберіп, артынша оны жұбайымен бірге қорлағаны үшін 80 сағаттық қоғамдық жұмысқа тартылды, деп хабарлайды Buqara.kz сайтының тілшісі.

ШҚО Қылмыстық-атқару жүйесі департаменті баспасөз қызметінің мәліметінше, өткен жылдың күзінде өңір тұрғыны әпкесі мен оның күйеуіне әдепсіз қарым-қатынас негізінде WhatsApp нөміріне әдепсіз сөздермен аудио хабарлама жіберген. Жәбірленуші жазбаны сақтап, оны сотқа жолдапты.

Белгілі болғандай, кейін апалы-сіңлілер арасында анасының мұрасына байланысты жанжал шыққан.

Сот әйелді құқық бұзушылық жасағаны үшін кінәлі деп тауып, 80 сағатқа қоғамдық жұмысқа тағайындады.

- Заңнан аттаған адам пробация қызметінде есепке қойылып, қоғамдық жұмыстарды орындау үшін жергілікті органға жіберілді. Сондай-ақ пробация қызметінің инспекторлары әлеуметтік-құқықтық көмек көрсету және одан әрі жұмысқа орналастыру туралы мәселені қарастыруда, - деді пробация қызметінің бастығы Алмас Бұйратов.