Қазақстан полициясының құрылуына 25 жыл толуына орай, ШҚО—да жол—патрульдік полиция инспекторлары сайысқа түсті. Жарысқа облыстық Жергілікті полиция қызметінің саптық бөлімшелерінің 20 өкілі қатысты, деп хабарлайды Buqara.kz сайтының тілшісі облыстық ІІД баспасөз қызметіне сілтеме жасап.

Жол-патрульдік полиция инспекторлары арасындағы жыл сайынғы «Үздік маман» кәсіпқойлық шеберлік жарысы Өскемен қаласында өткізілді. Облыстық жарысқа қатысушылар алдымен қалалық және аудандық бөліністерде іріктеуден өтті. 7 кезеңнен тұратын жарысты жол-патрульдік полиция инспекторлары жол жүрісі қағидаларынан білімін, алғашқы медициналық көмек көрсету, көлікті мәнерлеп жүргізу, жол қозғалысын реттеу шеберліктерін көрсетті. Оған қоса қарудан ату және дене шынықтыру даярлығы бойынша, сонымен қатар нормативтік-құқықтық құжаттарды білуі бойынша сынақ тапсырды.

Жарыс қорытындысы бойынша ШҚО саптық бөлімшелері арасында «Үздік маман» болып ШҚО ІІД ЖПҚ ЖППБ қызметі инспекторы полиция офицері Ержан Нұрахметов атанды. Полиция аға лейтенанты Ербол Даиров пен полиция лейтенаты Қуат Асубаев сәйкесінше екінші және үшінші орынды иеленді.

Ержан Нұрахметов

Жарыс жеңімпаздарына грамоталар мен бағалы сыйлықтар табыс етілді. Жарыс жеңімпазы Шығыс өңірінің атынан жол-патрульдік полиция қызметкерлері арасынан «Үздік маманды» таңдау бойынша республикалық жарыста қатысу құқығына ие болды.

Мейрамбек Қосажан