ШҚО-да мемлекеттік органдар өкілдерінің және туристік компаниялардың басшыларымен алғашқы кездесу өтті. Оған облыс әкімі Ермек Көшербаев қатысты, деп хабарлайды Бұқара.кз сайтының тілшісі.

Кездесу барысында өңірдегі туризмді дамыту бойынша бірқатар мәселе талқыға түсіп, мәнді диалог орнады.

- Туристік сала басшыларының көбін бұрыннан жақсы танимын, олардың ұтымды идеялары облыс экономикасын дамытуға өте тиімді. Жеке тәжірибелері барлығымыз үшін пайдалы болмақ. Экологиялық, ауылдық, шаңғы, жағажай туризмін дамытуға гранттар мен субсидиялар бөліп, жан-жақты қолдау көрсетеміз. Бұл, ең алдымен, Катонқарағай, Ұлан аудандарындағы және Марқакөл көлінің жанындағы қонақ үйлердің иелеріне тікелей байланысты, - дейді аймақ басшысы.

Оның айтуынша, облыстың туристік саласы шетелдік қонақтар үшін ғана емес, сонымен қатар Қазақстан тұрғындары үшін де қызықты болуы шарт. Риддерде заманауи тау шаңғысы курорты салынады, ол осындай демалыс аймақтарына лайықты бәсекелестік жасайды.

- Кездесуде көтерілген мәселелер өзекті. Кейбір трассаларда жол бойындағы қызмет көрсету мәселесі өте өткір. Біз 2024 жылды Жол жылы деп жариялайтындықтан, жөндеу және қайта құру кезінде әр 50 шақырым сайын қажетті инфрақұрылымы бар бақылау алаңдарын жабдықтаймыз. Әрине, туризмді арнайы мамандар таныстырғаны дұрыс, яғни гидтер. Өйткені, барлық әсердің басым бөлігі сол адамдарға тікелей байланысты. Бұл мамандықты, әсіресе ауылдық жерлерде оқытуды қайта бастау керек. Танымал демалыс орындарына маршруттарды ұйымдастырудан басқа, біз іс - шаралар өткізіп, оларды Шығыс брендіне айналдыруымыз керек. Бұл-бүркіт жарыстары, гастротурлар, түрлі фестивальдар. Біздің мәдениетіміз, музыкамыз, тағамдарымыз бен дәстүрлерімізді бүкіл әлем білуі керек. Инженерлік инфрақұрылымға, ұялы байланысқа және жер қатынастарына қатысты барлық мәселелерді де кезең-кезеңімен шешетін боламыз, - дейді Ермек Көшербаев.