Осы жылдың 25 мамырынан бастап өңірдегі 170 мектептің 141-і "Starlink"жоғары жылдамдықты спутниктік интернетіне сәтті қосылды, деп хабарлайды Buqara.kz сайтының тілшісі.
Енді облыстың 29 білім беру нысанында "Starlink" байланысы орнатылуда. ШҚО білім басқармасы өкілдерінің хабарлауынша, 2023 жылы "Республикалық ғарыштық байланыс орталығы" АҚ-мен "Starlink" геостационарлық емес байланыс жүйесі негізінде Интернетке қосылу жөніндегі пилоттық жобаны іске асыру бойынша шартқа қол қойылды.
- "Starlink" жүйесінің басты артықшылықтарының бірі - интернетке жоғары жылдамдықта қосылу. Желінің орташа қосылу жылдамдығы 50-ден 150 Мбит/с-қа дейін, бұл шалғайдағы және ауылдардағы дәстүрлі қосылу әдістерінің мүмкіндіктерінен едәуір асып түседі, - делінген ақпаратта.
Мектептерді цифрландыру – облыстағы барлық оқушы үшін білім беру саласына жасалып жатқан игі әрі маңызды қадам. Жоғары жылдамдықты интернет - ауыл мектептеріндегі білім жүйесінің ілгерілеуіне оң әсер етеді.
