Қазақстан Республикасының Тәуелсіздік күні қарсаңында Өскемен гарнизоны әуеге қарсы қорғаныс әскерлерінің әскери бөлімінде жас сарбаздар ант қабылдады, деп хабарлайды Өскемен гарнизонының баспасөз қызметі. 

Отанына адалдық антын Алматы, Қарағанды және Талдықорған қалаларынан шақырылған жүз қырыққа жуық жас сарбаз қабылдады. Ағымдағы жылы карантиндік шектеулерге байланысты әскерге шақырылушылардың ата-аналары салтанатты рәсімге қатыса алмады, бірақ олар оны онлайн-режимде бақылап отырды. 
Әскери қызмет-бұл бозбалалар үшін бірегей тәжірибе. Дәл осы жерде армияда жоғары патриоттық сана, өз елі үшін мақтаныш сезімі, азаматтық борыш пен конституциялық міндеттерді орындауға деген ұмтылыс қалыптасады.
- Ант мәтінінде Отанды қорғаудың асыл мұраттары шоғырланған, оған сәйкес әрбір жауынгер өзіне жоғары жауапкершілік алады. Салтанатты жағдайда, командирлеріңіздің, жолдастарыңыздың алдында Сіздер қасиетті ант сөздерін айтқан сәттен бастап, Отанның толық қорғаушысы болып саналасыздар. Біз сіздердің рух жігерлеріңізге сенеміз және бізді жерге қаратпайсыздар деп үміттенеміз. Сіздерге денсаулық, шыдамдылық, табысты қызмет тілейміз, өз туыстарыңызға мықты болып оралуларыңызға тілектеспіз, - деді сап алдында әскери бөлім командирі гвардия подполковнигі Жолжібек Нұрлыбеков.
- Осы айда біз ата-анамыздың көз алдынан жырақта жас жауынгер курсынан өттік, мақсаттарға ұмтылып, сенімділікпен батыл болуға талпындық. Алдағы уақытта бірге қызмет ететін Алматылық және талдықорғандық балалармен таныстық. Бір жылдан кейін мүлдем басқа адамдай өзгеріп, үйге оралатынымызға сенімдімін, - деп өз әсерімен бөлісті 97638 әскери бөлімінің жас сарбазы Самат Бердібаев.